最近情緒起伏好大，思緒有少少混亂，可能呢排做嘢太攰… 有一晚好夜收工，臨瞓前諗住除隱形眼鏡，點知無咩眼水，副 Con 痴住咗喺個眼球度，好得人驚 ！ 但我又太眼瞓，於是就冒險戴住副 Con 瞓覺 （大定千祈唔好學！）

朝頭早起身諗住再嘗試，又打喊露又逼自己喊，老公都俾我嘈醒咗。 見我神神化化咁問我咩事，我話我由琴晚開始除唔到副 Con，佢好無奈咁話：「你尋晚放工返嚟咪除咗囉！」

我好愕然，點解會完全無印象，好似記憶俾人消除咗咁。最近我亦試過朝頭早刷兩次牙，洗兩次面；仲試過找咗 2 次數俾供應商，好彩佢哋都好好人，知我大頭蝦成個林亞珍咁，所以都會提醒返我。不過以上種種，都令我開始懷疑自己係咪提早老人痴呆…. 

一個月之前，我揾咗以前一齊讀社工嘅大學同學 Phoebe，佢同我一樣畢咗業之後都無做社工，佢而家做緊頌缽和單弦琴聲音療癒。我向佢求救，睇吓有咩辦法可以幫到我。

Phoebe :「你呢啲症狀係都市人常見嘅情緒問題，要令到自己有機會釋放負面情緒同壓力。」

我：「我已經成日跑步同做瑜伽，運動已經減少咗我好多壓力，仲唔夠咩？」

Phoebe :「雖然有運動，但有時壓力太大、工作太忙，無機會令自己靜落嚟，去讓身心得到休息，就會變得思緒好混亂！而利用冥想。就好似身體需要拉筋，其實情緒都需要拉筋。而冥想就係主要幫你情緒減壓。」

其實我之前都有試過冥想，一係太忙冇再做，一係做咗冥想就瞓着咗，不過我都認同冥想嘅效用。就好似我之前研究護眼食療，見到有資料話只要每日花少少時間做護眼操，幫眼部肌肉拉吓筋，就可以減輕老花症狀。我試咗兩星期，又真係覺得睇嘢清楚咗。所以我都認同，情緒同身體一樣，都需要拉筋。
Phoebe :「不如咁啦，你試吓透過我嘅頌鉢帶領你冥想啦。」我二話不說就應承咗！

我同屋企人講我會去試吓頌鉢體驗之後，細佬都好好奇，話要玩埋一份。

佢聽完 Phoebe 講解個療程之後，笑住咁話：「好簡單姐，姐係聽住啲流水聲瞓覺，好似好正咁！」

Phoebe ：「係呀，個療程同你講嘅嘢都類似㗎。」

我諗細佬可能仲好掛住之前去台灣阿里山嘅體驗。嗰時老公帶咗對仔女去阿里山，體驗一下遠離都市嘅感覺。佢哋住咗喺當地嘅一間民宿，民宿人好好人，有時仲會帶佢哋去野外探險，沿途會聽到好多流水聲、雀仔聲、青蛙叫，令佢哋覺得好治癒。甚至老公有時失眠，都會開 Youtube 聽住流水聲瞓覺。Phoebe 話呢種都係聲音治療嘅一種。

Phoebe ：「好多人會覺得冥想同頌缽好神化，但事實並唔係咁，聲音療癒係已經得到科學證實佢嘅效用。大自然嘅聲音係可以同我哋嘅身體產生共鳴。因為人體有70%是水分，透過聲音嘅震頻（Vibration）可以調節身體頻率，令到身體有阻塞的位置可以放鬆！簡單嚟講，就係頌缽嘅聲音可以幫我地身體得到深層放鬆，平衡身體狀況，，緩緩壓力同情緒！」

經過呢次體驗之後，我對冥想嘅理解再加深咗。我學識咗唔再逼迫自己做一啲唔想做嘅事，亦都唔再糾結喺唔開心嘅事上面，透過今次，我好似更深入咁認識自己。

其實我之前成日都被好多負能量同頻率包圍，成日都好焦慮，焦慮嘅來源係覺得自己做得唔夠好、唔夠多。原來呢啲負面嘅情緒，係會形成負能量同頻率，喺我哋身體周圍震動並產生影響。相反，如果我哋可以令愛、關懷同理解嘅情緒包圍我哋，活在當下，正面嘅能量就會圍繞喺我哋身邊，亦有更大機會吸引同樣正向嘅能量同事件發生喺你身上。

我接受到自己唔係萬能，唔洗強逼自己任何事都做到 100 分。

今次嘅「情緒拉筋」體驗，我覺得好似馬拉松前嘅熱身拉筋咁。臨馬拉松前我都會好緊張個比賽，但一到賽前拉筋時，我都會提自己要放鬆，唔好太在意個名次同成績，唔好為勝利而跑，最緊要享受個過程。每次拉完筋放鬆咗個人同情緒之後，跑步嘅時候都會有種活在當下嘅感覺，同自己講跑得慢都無所謂，最緊要唔好整親。

原來我自己不知不覺都喺工作中開始追名次同成績。今次嘅情緒拉筋體驗，令我揾返嗰種活在當下嘅感覺，令我明白到自己嘅唔完美。疫情底下當然冇得再做，希望疫情快啲過去，可以再次比自己得到舒壓釋放嘅機會。