【會展站通車大日子
】

今日港鐵會展站通車大日子,網上不斷發佈類似呢張照片,笑鐵路迷好毒、宅男 「我唔覺喎,人人應該有唔同嘅興趣,睇張相都覺得佢哋真係由心而發,覺得好開心啊」細佬講。 家中嘅細佬都係一個標準嘅鐵路迷:細細個每次搭地鐵佢會好注意列車同路線;每次更新唔同站,佢亦都會好留意到更新路線圖嘅變化;又會同我講地鐵「短貴長平」嘅收費結構嘅問題;好細個嘅時候小學,就已經留意到,去邊個站轉車,行得少啲,快啲返到學校。佢咁鍾意交通工具,我問佢點解唔一齊去慶祝通車?佢話:「人人有唔同興趣,但人人有唔同表達方式。」 網絡上普遍覺得佢哋好毒好宅,原因係因為見到地鐵迷喺月台車站狂奔、喺車廂裏面影相跳舞嘅畫面。但細心諗返我哋嘅童年,去演唱會見到偶像狂奔、喺紅館座位上起身跳舞,點解唔會俾人笑好毒好宅?唔通一個係地鐵月台、一個係演唱會發生就分別咁大? 「其實興趣唔應該分低俗定高尚,我鍾意Mirror, 同細佬鍾意地鐵巴士,根本就冇分別!」家姐插嘴 「人人有唔同追求開心嘅權利,只要唔傷害人就得;我見到佢哋咁跑法,我都覺得好得意好好笑,但喺恥笑人或中傷人嘅人,我就覺得佢哋好可憐」 我問家姐,如果俾人網絡欺凌嗰個係你,你會如何?她淡淡然回應一句:「唔駛理佢哋,唔值得將人哋嘅負能量去懲罰自己!」 年青人真係俾我哋中年人更加容易睇得開、更容易搵到點樣令自己開心。佢地就好似一棵綠色植物一樣吸入二氧化碳呼出氧氣,將社會負能量變成正能量。原本我都諗住:「作為成年人,我點樣幫年青人打算?」而家我都調返轉:「作為成年人,我點樣向年青人學習?」 Facebook: https://www.facebook.com/MayNganBirdNest/posts/5064870473560574
2022-05-31

【我2022年生日願望】

上晝食完生日早餐,一如以往週末,一家人齊齊整整去跑步 「老婆,今年有咩生日願望?」 我諗一諗,就話:「希望仔女長大健健康康,疫情過去大家快快樂樂」 老公聽完之後話我嘅生日願望好「離地」,我表示唔明佢就話: 「我細個好鍾意睇嘅漫畫叫七龍珠,任何人儲齊七粒星可以向神龍許願,有啲似你哋女仔見到流星要瞬間講出願望咁樣啦:邪惡嘅奸角多數希望長壽、永生、力量或財力增大⋯只有主角向神龍許願祈求朋友家人復活,見得出主角嘅願望同自己私慾無關⋯咁你話啦,你究竟係冇慾望,定係離地?」 「老公,我嘅願望當然唔離地,簡直係私慾添!」 時間過返去一個月前 三月尾當政府宣布話4月21號恢復面授課,我好記得細佬好純真咁對住電視講:Yeah🤩🤩 細佬而家中二,小六畢業典禮要改用zoom、升上中學加埋都冇實體課超過100日、同學仔嘅面孔仲非常陌生、放暑假佢已經「冇感覺」⋯對比起我哋嘅童年,小六畢業寫紀念冊、升上中學最開心有課餘活動、同學仔放假仲可以去宿營,而最最最唔同,就係我哋會唔捨得放完暑假! 疫情至今嗰種患得患失連大人都招架唔住,何況係小朋友? 我哋兩代只差30年,但彼此嘅童年對比可以咁大!社會、科技越來越進步,但小朋友反而越嚟越唔開心,我只想我哋下一代恢復正常生活,難道呢個都仲係「離地」嘅願望咩? 「尋晚食飯食到10點,見旺角條街到處都係人,雖然舖頭好多關門執笠,但人來人往嘅感覺就係正常,我嘅生日願望只係想大家變返正常!」 未來嘅社會,我唔希望見到小朋友會越嚟越孤立離群,網絡欺凌越嚟越嚴重,工作越來越難有滿足感 所以我先祝願大家可以係最壞嘅時候仍然能方寸不亂、更好係保持幽默,先能夠活得從容自在   Facebook: https://www.facebook.com/MayNganBirdNest/posts/5007743682606587
2022-05-31

【大人換個角度,學習小朋友從瑣事中搵到小滿足。】

今日兒童節,邀請咗位好耐冇見嘅媽咪朋友,帶埋佢6歲嘅仔仔嚟我屋企玩同聚舊。一入屋,佢仔仔就好活躍,好似去咗遊樂場咁周圍探索。我哋屋企有幾架平時運貨用嘅板車,佢好興奮咁坐咗上去 (有大人睇住嘅情況下) 當自己喺森林度坐住越野車探險😂我喺隔離見到,突然明白好多嘢原來只要換個角度去睇,小朋友都可以從瑣事中搵到小滿足。 我媽咪朋友話學校因為疫情停課,小朋友長時間留喺屋企,而仔仔又比較活潑,日日 Zoom 放唔到電;但同時又驚四月尾返學上實體堂會中招,所以都好矛盾… 我即時心喺度諗:點解大人總會「杞人憂天」?而小朋友總會「天塌下來當被冚」? 疫情下大人喺小朋友身上學習到:小朋友就算返唔到學,喺屋企一樣可以快樂學習。甚至學到更多喺學校學校學唔到嘅知識。我屋企咁啱有一套小朋友學習嘅Board Game,可以透過模擬超級市場嘅環境,令到小朋友可以學習到計畫購物 (例如分析邊啲野需要購買、邊啲嘢唔需要) 同埋基本金錢觀念,而且仲可以增加佢哋對唔同事物嘅認知。 除咗可以幾個小朋友一齊玩,亦都可以好似我咁,家長同小朋友一齊玩。而且呢個遊戲學習到嘅嘢係非常實用,可以運用到生活之中! 雖然而家嘅小朋友無咗好多實體上堂嘅時間,留喺屋企嘅時間多咗好多,但係我哋都可以換個角度思考,令到佢哋喺屋企嘅時間都可以更充實。家長們花啲小心機,置學習於娛樂,令到小朋友喺玩樂之餘,亦都可以學到唔同嘅知識。 「原來小朋友嘅世界,唔單只係小小嘅zoom框框中學習,原來佢哋比我哋大人更加適應喺疫情中搵到快樂!」 好多事往往未能盡如人意,但係事實已經發生咗不能逆轉,唯一可以改變嘅就係我哋嘅心境。我諗起一句英文嘅諺語: 「When life gives you lemons, make lemonade.」 其實我哋有時可以突破個框框「When life gives you lemons, we add jelly, syrup, and soda into it. Make fruit punch.」 與其將生活上嘅框框視為障礙,不如將佢變成工具。只要繼續敢想敢做,就可以將規限化成無限。 最後,祝大家大人可以繼續保持童心,而小朋友兒童節快樂🥰💗   Facebook: https://www.facebook.com/MayNganBirdNest/posts/4908859412495015
2022-05-31

【多謝醫護人員捨命stay at work】

睇完梅艷芳傳嘅最後一集,除咗好感人之外,最後一集睇返2003年嘅沙士情景,竟然同依家嘅2022年一模一樣,令我非常驚訝! 我記得當時嘅沙士,香港人唔敢出街,常常需要戴口罩😷,情緒都非常低落😞真係同而家嘅疫情一模一樣……依家甚至要有機會禁足,令到好多物資都買唔到!而梅艷芳轉當中沙士嗰幕,佢就多謝婉雯醫生捨命救香港人,令我依家我都好想多謝咁多位醫護人員,捨命地stay at work🧑🏻‍⚕️👨🏻‍⚕️真係十分感激🙏 醫護人員真係抗疫英雄,但社會中其實仲有好多無名嘅英雄,包括清潔工人、外賣員或者其他運輸工作嘅人士。如果呢段時間佢哋全部都冇stay at work,相信社會更加會變得一團混亂—冇清潔工嘅幫手,香港嘅街道會越嚟越多細菌;冇外賣員嘅服務,就更加多人落街搶購令細菌散播;冇運輸,抗疫產品都唔能夠入到香港市場。如果冇咗呢班無名英雄嘅幫手,我地stay at home 都會變成stay in hell! 70、80年代嘅時候我都係公屋長大,最記得當時爸爸同我講一句:「細時唔讀書,大時做運輸。」冇錯,運輸工人入行嘅門檻真係好低,而且好容易就會比其他人取替,但並唔代表我哋可以對呢個行業唔尊重。人工低並唔代表可以唔尊重佢哋,更何況其實對任何人都應該保持尊重,呢個道理都係爸爸自細教我嘅。 昨日我成日都喺個倉度包貨同執貨,真真正正令我感受到做倉同埋運輸同事嘅辛酸。尤其係而家疫情嚴重,我更需要帶兩個口罩再加一個眼罩,然後仲要仲做體力勞動嘅工作,真辛苦x10!仲有我唔敢飲水,費事飲水嘅時候感染到其他同事;而且個倉已經有一半員工留喺屋企工作,剩返一半員工默默耕耘做埋其他人嘅工作,勞心勞力為我嘅fans發貨,我真係好感動! 其實喺社會入邊,仲有好多無名英雄我哋都需要敬重,如果冇咗佢哋無私奉獻,香港呢個社會都唔知點樣喺危難之中繼續運作落去……我認為只要對社會有努力、有貢獻,其實人人都係平等! 梅艷芳傳仲記錄過佢講嘅一句話:「個天俾咗咁多嘢我,我左手接着之後,右手應該俾返多啲出去。」我老公見到我全日工作完之後,都講笑咁同我講話:「左手(順豐)都做唔住嘅嘢,右手(MILY團隊)都要自己撐住。」 我同同事會盡力解決大家到貨嘅問題,希望大家點時間同包容我哋🙇🏻‍♀️🙇🏻‍♀️   Facebook: https://www.facebook.com/MayNganBirdNest/posts/4885324071515216  
2022-05-31