最近趁仔女返咗學嘅時候幫佢哋執房，發現家姐真係有好多雜物。特別係啲貼紙，一疊一疊咩公仔都有，最多係佢最愛嘅柴犬。仲有好多我以為佢會唔鍾意嘅公仔，佢都儲咗喺度。

我問佢點解買落咁多貼紙，佢答：「好多都係淘寶買㗎，又平又快呀嘛！」我問佢咁多點用，其實佢都唔知! 好多張佢都無認真咁望過，有啲明明都唔係佢鍾意嘅 Style… 

正當我想話佢咁嘅消費態度唔正確嘅時候，佢忽然話：「媽咪，我估你間網店都會搞雙十一嘅宣傳㗎啦！啲野平先會多人買，生意先會好，乜唔係咁㗎咩？」

佢咁樣一問令我自己都開始反思，其實我之前又何嘗唔係有過度消費嘅習慣。以前經過肥仔開倉都會忍唔住入去行吓，成日買埋好多劣質電話配件，充電線都十幾條，因為貪佢夠平… 但係好多都係用一段時間就壞，一壞又會因為貪平再幫襯佢哋  後來無意中上網見到資料，原來電話充電線、電腦板，呢類型嘅電子廢物係最難分解嘅物質。

之前亦會貪平貪方便去一啲 Fast Fashion 嘅店買衫，但買落好多件都只係著到一季，質地太差，啲 T-Shirt 洗幾洗就好殘，領口越洗越大… 其實好多時裝工廠都設立喺工資較低廉嘅發展中國家，啲衫咁平，都係從壓榨員工而嚟。因為當地欠缺完善嘅法律制度去保障工人，而工人嘅日薪好多每日只有兩蚊美金，咁低嘅人力成本，件衫嘅售價當然平。

仲有團購又係我以前沉迷嘅一樣野，最經典係團購自助餐。真係成日中伏，難食不特只，有次仲食到全家人都肚痾… 

其實因為貪平而去購物，我覺得好似一種病，而且令到購物係本末倒置。

身邊有好多朋友得閒無事就會拎部電話出嚟，喺度不停瀏覽啲購物網站，睇吓邊度有平嘢買。每次買都係百幾二百，自己唔覺，但其實累積落嚟係一條好龐大嘅數目… 開心又買，唔開心又買，因為大家都抱著「反正咁平丟咗都唔心痛」嘅心態購物。

我真係唔想下一代都咁過度消費，唔想佢哋本末倒置，更唔想下一代失去咗呢個咁翠綠嘅地球。

呢段時間因為疫情關係，人類減少咗消費活動、戶外活動同商業活動，我跑步嘅時候都發現咗好多我之前未見過嘅動植物，個環境好似活化咗咁…自己都諗，其實人類如果唔係過度消費，係咪會對地球會好啲呢？

所以我決定明天唔跟隨其他店舖搞「雙十一大減價」，只係做「任何產品消費免運費」。我唔想鼓吹過度消費，亦反對消費者因為貪平，喺出面購買好多劣質嘅產品。我哋應該攜手同下一代一齊關注環保，令地球有喘息嘅空間。