呢段時間都喺屋企避疫，無得出去跑步做運動，我覺得自己成個人都肥咗一圈，肌肉都流失咗好多 🥺😣 而家每日都同小朋友由朝到晚痴埋一齊，朝早七點就會俾佢哋玩嘅聲嘈醒，想瞓多陣都唔得🤦🏻‍♀️ 

本來諗住疫情應該會好快過，點知每日嘅新增個案有增無減，政府最新公布嘅限聚令連晚市堂食都禁埋，睇嚟留喺屋企嘅日子仲有段長時間😭 但係與其不斷擔心焦慮都無補於事，所以我呢幾日制定咗一啲屋企都可以做到嘅居家運動計劃，希望令到自己每日都可以郁一郁，Keep Fit 之餘亦可以保持身體健康，增強免疫力💪🏻

而飲食方面，我主要以高蛋白質、低脂肪嘅飲食餐單為主。一日至少都會有一餐，係用慢煮嘅形式去煮我近排大愛嘅雞胸。因為慢煮可以保持到食物嘅味道、營養同埋肉質。雞胸我會先醃製後慢煮，最後將雞胸肉兩邊煎熟，再切開，食起上嚟外脆內軟，唔會好似一般煮出嚟嘅雞胸咁鞋烚烚！通常我一次會煮好兩三餐嘅份量，再放入雪櫃冷藏保存。

如果你要長時間留喺屋企，但又因為要照顧小朋友，無咩時間休息，可以調整一下運動同飲食：

🥊運動類型
如果無時間，就唔好逼自己做一啲需要大量時間修復嘅高強度訓練，身體休息時間唔夠，反而會造成身體慢性發炎，更加容易病。

可以揀啲強度中低但次數高嘅肌力訓練，同時鍛鍊肌力同提升心肺功能，多啲肌肉可以幫助燃脂㗎！💪🏻

真真真係無時間的話，踎低起身(即係深蹲) 幾下都有用㗎😀

🍗 飲食方面
飲食絕對係瘦身同健康嘅關鍵。即使日日留係屋企，都記住唔好食太多，亦都唔好食太少。食太少身體無能量，亦會將代謝降低消唔到脂，會令到你個人無乜精神… 我一向都無計算卡路里，從來都好聆聽自己身體嘅聲音，想食就食，食飽就停。依家食嘅食物都係自己準備，確保自己嘅蛋白質攝取充足，配合埋簡單嘅運動，令到自己就算長期留係屋企，都未至於令到啲肉變到鬆泡泡。

🔥保持動力、放鬆壓力
我每日都同小朋友留係屋企，除咗對住佢哋，又要處理工作，要影相、拍片、處理公司一堆雜務，其實真係好攰。但係我發現懶開真係真係有條路，之前成日比藉口自己，一係攰一係無時間，但係當自己就算瞓飽有時間，都淨係想攤喺度乜嘢都唔做🤦🏻‍♀️於是我就會睇一大堆人哋做運動嘅片，亦會睇一啲 Fit Girls 嘅相去鼓勵自己，令到自己時刻都保持動力！有時就買啲靚嘅運動衫都有助提升興趣🙈🤣

呢段時間大家對疫情可能都好緊張，但係記住一定要放鬆心情，唔好俾太大壓力自己。有時我會淨係坐喺度，練習腹式呼吸，個腦咩都唔諗去放鬆🧘🏻 順便練歌🤣

唔知道呢段期間，大家多咗時間留係屋企，多咗時間面對自己、面對屋企人，又有冇一啲新嘅體驗同想法呢？歡迎留言話俾我聽，希望大家都可以身體健康之餘身心都健康愉快😘