現代人經常話唔夠幸福，而我家的小朋友郁啲就話要「爭取幸福」，講嘅係爭取飲珍珠奶茶、爭取打機時間…現代小孩好像永遠與幸福距離很遠、很遠。

放棄要「爭取幸福」的權利，印象中只發生過一次，A是我舊同事，A男朋友嗰晚同佢講分手，我與一眾閨蜜一齊同佢訴苦，一位閨蜜情緒高漲高聲喊道：「我哋所有女人嘅幸福，係要自己爭取㗎。」

不知何故，我兒時根本沒有爭取什麼幸福，更根本沒有什麼幸福的概念。只覺得一家人健健康康，星期日一家人出街行吓（真係行下，就算食麥當勞都係中二先第一次食）。還記得我係去觀塘的舊麥當勞，印象記得我兒時觀塘很熱鬧，並不是像現在一樣冷清。

世衛公布意大利感染及死亡數字係全世界第一，當中原因係意大利老人家指數係全世界第二多。我立即想想，香港究竟有咩地區係最多老人家？不其然想起我兒時長大的觀塘，我立刻聯絡我以前舊社工同事，希望係觀塘區義派疫情物資，佢火速幫我聯絡到觀塘一間社企餐廳，然後我同一家人立即行動。

我們一家人嚟到觀塘一家食堂。呢間食堂會免費給與老人家或露宿享用午餐及晚餐。11點剛剛午餐開始，但已經睇見一班老人家好珍惜、感恩係自己枱上嘅食物，而且面上流露一種幸福的樣子。我和小朋友，在食堂較為偏僻位置負責義派，亦為免老人家行動不便造成爭先恐後，我亦先吩咐小朋友包裝好搓手液及口罩，方便老人家吃飯後拿走。

其實世衛亦同時公布因為疫情令到整個地球嘅空氣質素健康：廢氣排放量減少、海水質素提升…其實我一直相信呢個病毒係地球嘅「白血球」，白血球出現係因為地球真正病了及有細菌，而現在正正打緊一場大仗。但我經常反問自己，點解呢場疫情遭央嘅多數係一班無辜嘅老人家？

做完第一輪嘅義派，小朋友都好肚餓，我留意到佢哋午餐冇再叫佢哋心愛嘅珍珠奶茶。「唔飲啦，公公婆婆都冇飯食，而且飲管又唔環保！」

呢次疫情，真係帶俾咗好多人唔方便，我亦趁呢個時候令我小朋友反省及思考：我們活著最需要什麼？不斷消費、追求個人或國家成功，只能夠帶來短暫嘅幸福？要長遠及永恆嘅幸福，係需要我哋學習懂得一顆感恩嘅心，喺錯誤發生之後諗辦法如何修補，喺危難之中諗下點樣互相扶持。停課不停學，我希望我哋及下一代我大家要反思點樣對我哋地球再好啲。