大女嘅生日大日子，我送咗張卡比佢，希望佢明白現在就是禮物（present is a gift)

我大女成績好好，經常攞全級第一、二，但都有好多陋習：食飯唔專心睇IG、食嘢貪快唔咀嚼、唔珍惜食物…（冇錯，所以你見到佢咁肥）

話說疫情期間冇得返學，終日喺屋企悶悶不樂。

👧🏻「媽咪，冇得返學我覺得自己好冇用…」之後佢情緒大爆發爆喊！

👩🏻「冇得返學就覺得自己冇用，咁樣唔係真正有用…」我一邊撫摸佢額頭細細聲咁講。

👩🏻「冇得返學大家都唔想，不如大家試吓搵一啲興趣出嚟做下？」

我嘗試引導佢哋玩puzzle ，但佢哋覺得太容易又好快冇興趣；咁我見我個女成日都整乾果烘焙，又見佢成日鐘意人地生日整蛋糕，我就嘗試建議佢：

👩🏻 「不如試吓整蛋糕？ 之前見你都話想做甜品師…你不如整個蛋糕俾我同爸爸試吓？但講明先我唔要高脂、亦要gluten free、仲有… 」大女好細心咁將我嘅要求一一寫落自己嘅筆記本薄。

短短兩個月期間，我留意佢好留心學整蛋糕，佢冇再喺食飯時間睇IG，反而多咗時間上YouTube搵學整蛋糕嘅資料；學習期間佢亦都學識點樣珍惜食物；而家亦見佢食飯都慢咗，多咗對姊姊炮製晚餐嘅一顆欣賞之心。

啱㗎，「現在真係一份禮物。」原來生活之中其實有好多好微細嘅感覺平時係察覺唔到，就好似天上嘅點點星光而家喺香港已經睇唔到，因為香港嘅人造燈火已經令都市人睇唔到繁星閃爍；就好似太多人為自己事業而賣命奮鬥，誰不知都係人造燈火，人造燈火令大家睇唔到自己本身身上豐盛嘅恩典。其實往往有價值嘅嘢已一早植根自己內心深深處，只係等待我哋細心嘅觀察幫佢地發芽發光。

希望我嘅大女好好感受、接受每一個生活片刻；每日自信、開心咁過。雖然今日唔係520 ，但媽咪今日都想同你講聲：「我愛你+01」