奧斯卡電影琴日公布，立刻去睇「爸爸可否不要老」，除咗想睇男主角演技之外，套戲原來係由舞台劇改編（以前中學我都有玩舞台劇）套戲睇完你會覺得好似睇完驚慄片外，亦都明白多咗老人癡呆症嘅無奈。發病嘅人會情緒波動、懷疑人生；而屋企人亦會因為照顧老人而情緒波動、甚至同伴侶嗌交或離婚

我冇打算劇透，亦都冇打算教大家如何避免老人癡呆（現今科技仍然未有直接方法避免及解決老人癡呆）。我發覺家中就算有老人家冇老人癡呆，老人家都難免會思緒雜亂無章、活在過去，面對咁嘅情景你亦都唔係單單叫佢哋活在當下咁簡單就可以解決。

睇完戲最深刻係：最痛苦並非肉體上嘅折磨，最痛苦莫過於「心很累」

戲中爸爸經常處於混沌、無理、固執狀態，而堅守孝道嘅女兒亦默默守護、不離不棄。而最令我深刻係戲中爸爸經常執着逝去左嘅妹妹，反而對佢不離不棄嘅姐姐就唔珍惜，最終姐姐都無奈屈服要將爸爸送去老人院。

現實中我都有類似發生嘅事，我爸爸長期患糖尿病，上年仲影響到腎功能，上年開始帶佢做螯合治療都發覺佢非常固執：「…糖尿病係遺傳㗎，冇得醫㗎喇！」我經常提醒自己要忍耐、慢慢解釋及糾正佢錯誤飲食嘅習慣及適量嘅運動，喺九個月嘅治療之後好彩係成功將指標降低，佢身體精神咗，減磅亦成功；幸運地我爸爸亦沒有戲中的爸爸那麼偏執，佢經常教導我哋要記住美好嘅事情同埋對你好嘅人，而過去咗人和事就唔好再執着，所以每逢我哋每週五晚飯聚會，佢真係好似西方晚餐咁「敲杯」帶頭叫大家將自己嘅「執着」要放低（當然佢會帶頭講自己嘅先）所以每周晚飯聚會我哋都會夾雜着淚水、笑聲中渡過

「爸爸可否不要老」都係我嘅心聲，當然更加要提醒自己努力令自己不要老，除咗飲食及運動要努力之外，大家亦都要努力活在當下，努力將自己心中嘅仇恨即時放低