忙完 IFC pop up 實體店之後,終於有時間放鬆吓陪吓屋企人😌 同咗仔女去咗南丫島行山,由索罟灣行去榕樹灣。

出發之前家姐問我 :「係咪去有好多魚仔同紫菜賣嘅嗰個島?」個囡同我一樣係路痴😂成日唔記得啲路線同地方名,我哋都係去到嗰度先醒起係南丫島。

榕樹灣碼頭已經見到有好多擺賣島上特產嘅攤檔同小店。由於放假嘅關係,店主們都一家大細出動招呼客人,都比較忙碌。

眼見島上嘅小店普遍都比較殘舊,大囡問我 : 「點解佢哋唔喺市中心啲商場開舖?呢度咁偏遠…」

「因為小島同小店店主資源有限,如果要喺大商場開舖,成本一定會大大提升,啲貨一定要賣到好貴,但係呢類型嘅小島特產未必可以賣一個非常高嘅價錢。」我如實作答。

「點解呀?」

「因為要賣得貴要講求包裝靚、請代言人、賣廣告,而且商場宣傳成日都需要Gimmick。如果佢哋真係要喺商場賣呢啲特產,可能要包裝成富山縣特產螢光小魚,或福島縣海苔紫菜先sell得😅

「點解呀?」

「商場吸引人流需要新鮮感,而市場比較稀有嘅產品往往比較吸引人。」

「點解呀?」

佢真係問到我啞咗,諗咗一陣,我語帶無奈咁答 : 「因為人都係要生活喺商業化社會。」

囡囡個樣明顯有啲唔滿意我個答案。為咗避免尷尬尷尬場面,今次到我問返佢 : 「咁你覺得媽咪間舖會唔會好商業化?」

佢毫不猶豫就答我 : 「唔會呀!因為我見住你落手落腳去做,成日試產品、有時包貨到夜晚。有時星期六日成家人都要陪你做嘢拍片😒 」

呀仔都忍唔住加把口 : 「如果你好商業化,你間 IFC 實體舖就唔會開得一個月就執笠啦!」

我聽完之後都忍唔住大笑😂😂😂

小朋友會不停發問,完全係因為佢哋與生俱來嘅好奇、同理心、及關心別人嘅心,縱然係素未謀面嘅陌生人。相反大人只會懂得計算、冷漠、及對陌生人抱有好大懷疑。小朋友而家嘅力量雖然細小,但無疑未來嘅世界係屬於佢哋,所以唔好看輕每一個小朋友嘅發問。只要佢地對世界不斷有好奇心、不斷問點解,而大人亦都耐心咁解答佢哋嘅問題,我哋嘅未來一定會比而家更加好。

嚟緊陸陸續續,我都會有更多嘅香港品牌喺 May I Keep Young 上架,希望可以支持到更多本地嘅小店 ❤️如果你係一個本地生產嘅店主,我亦都歡迎一齊合作,可以inbox我🙇🏻‍♀️