【我們的紀念日】

每年嘅 12月25號 聖誕節係我同老公嘅結婚週年紀念日，而 2月14號 情人節就係求婚紀念日。曾經聽過一啲唔認識我老公為人嘅朋友話：「你老公咁 Cheap 嘅，專登揀呢兩日結婚同求婚，係唔係想慳返兩份禮物😂」

通常我聽到呢啲說話都唔會出聲。因為我哋兩個都覺得節日嘅意義並唔係為咗要收名貴禮物，節日嘅意義係要彰顯人與人之間嘅愛同關懷。

其實我同我老公係識於微時。我哋兩個中六開始拍拖，拍咗 9 年拖後結婚。到今年已經結婚 17 年。拍拖同結婚嘅時間加埋，我哋一齊咗 26 個年頭（已經係銀婚級數❤️） 我哋唔止同一間中學讀書，仲係同一個屋邨長大後。另人更驚訝嘅係，老爺奶奶話其實一早已經認識我同爸爸媽咪，因為始終同一個屋邨生活，有時搭𨋢都會撞到。所以前後夾埋，我同老公應該都識咗超過 30 年！

大學畢業後，我成為咗一名社工，而老公就投身設計行業。以起薪點嚟講，社工嘅人工比設計師高。但老公嗰時並無因為咁而感到自卑，佢仲叫我賺到錢之後要儲錢，俾多啲屋企人。而且佢非常上進，搵好多設計嘅 Freelance 做。好記得佢啱啱入行嗰幾年，忙到聖誕、新年都見唔到佢，莫講話一齊慶祝。我知佢咁辛苦都係想盡快儲到錢，03年同我結婚之前，可以上到車做業主。

我同我老公都係慳家之人。以前拍拖每逢大時大節，我哋都唔會去西餐廳慶祝，因為又貴又難 Book。我哋通常都係會去酒樓食餐飯就算😂話說 2002年嘅 2月14日，我哋都係按照慣例去酒樓食飯。不過嗰日佢竟然帶咗我去一間我最鍾意嘅西貢海鮮酒樓。其實嗰刻我都預感有大事發生，果不其然，佢嗰晚真係同我求婚🙈💍 成個過程無咩大驚喜大排場，係唔浪漫㗎啦，我老公就係啲咁務實嘅人。

我哋 03 年結婚嘅時候撞正 SARS，嗰陣時酒樓一席都係 $4500，平到無人信。雖然有好多朋友都叫佢唔好咁老套同孤寒，揀酒店擺酒好似體面啲。但我老公都無理，佢覺得銀包搵幾多咪洗幾多，何必要冒充大頭鬼。去到擺酒嗰日，好多親朋因為疫情無出席，我老公二話不說話要頂晒佢，唔想洗屋企人嘅錢。

其實我都戥佢肉赤，酒席嗰度夾埋都唔少錢，意味住佢又要努力搵 Freelance 儲錢。佢安慰我話趁後生緊係要努力搵錢，無謂要兩家嘅屋企人擔心。諗深一層，其實每逢屋企遇到有咩難題，我老公都會第一時間出嚟幫手解決。佢公司有任何上上落落，同事面對任何困難，佢都會挺身而出。甚至乎 May I Keep Young 一開始，我老公都幫我處理咗好多問題，有咩事都一個人頂硬上。

十幾廿年佢都係堅持一個信念：錢唔係用嚟消費享樂，錢係用嚟雪中送炭，幫助別人。

所以咁多年嘅大時大節，我哋都係簡簡單單咁度過。好似琴日嘅聖誕節，我哋都係喺屋企開 Family Party，屋企人開心食餐飯。佢從來都唔會買名貴手錶、房車，就算買名牌，都係送俾兩家嘅爸爸媽媽同我。佢自己開支貴少少 (3百幾蚊）嘅酒，就已經好滿足。

佢最大嘅嗜好除咗跑步，就係飲酒。就算飲酒都係幾百蚊就夠，佢話貴酒同平酒其實係無分別。貴酒可以用嚟喺大時大節招呼客人；平酒或者過期嘅酒就可以用嚟煮餸，貴酒同平酒其實都有各自嘅功能同特色，無話名牌同 Cheap 之分。我諗我老公中年以後，目標都係想成為一個「住家男人」～

我忽然諗電影「國產凌凌漆」入面周星馳嘅豬肉佬 😂 豬肉佬其實都無分貴賤，但係一杯揸住 Dry Martini 嘅豬肉佬，就真係好似一隻漆黑中嘅螢火蟲一樣，咁有才華咁出眾。

我好感恩呢26年有我老公陪我一齊度過，我覺得好幸福❤️老公， I LOVE YOU！結婚17週年快樂 🥰