老公無端端 WhatsApp 咗呢張相俾我,相入面嘅自己有少少緊張同僵硬,係我臨出 Facebook Live 之前佢影嘅。

我問佢做咩影張咁嘅相,佢話:「見到你咁認真準備嘅樣,想做個記錄姐。你呢個表情令我諗起最近一套 Netflix 嘅戲 Queen Gambit 后翼棄兵個女主角,佢捉棋嘅時候個樣都係咁,好投入好認真。」

其實我都唔知佢講咩,因為我平時好少睇 Netflix,通常睇韓劇多。因為佢話好好睇,所以夜晚陪佢睇咗兩集。睇緊嘅時候,我問佢:「個女主角個樣成日苦口苦面,我似佢咩?」

我老公話:「你睇多幾集先啦,你睇多幾集就明。」

於是我繼續睇落去,睇到女主角 Beth 個養母出場。佢表面上係一個端裝賢淑嘅女人,但實際上成日酗酒。明明好有音樂天份,卻藉口多多,甘於放棄自己嘅夢想,做一個男人背後嘅平凡女人。過咗無幾耐,佢老公,姐係 Beth 個養父就出走,丟下佢兩母女。

女主角 Beth 同佢養母個性格就好大分別。佢媽媽因為交通意外逝世,自細喺孤兒院長大,非常堅強獨立。後來仲喺孤兒院學識捉棋。以前西洋棋基本上係男人嘅世界,但係 Beth 打破傳統,唔怕同男人競爭,亦都唔容易妥協。佢係一個唔會限制自己,同埋唔會俾傳統束縛嘅女仔。

睇到呢度,好彩我老公唔係話我似養母!不過話我似 Beth 又太抬舉我啦… 我又唔係想做世界冠軍,同埋我都無佢咁硬淨,我都會怕孤獨㗎… 但我承認我唔係一般傳統結婚之後嘅媽媽,我仍然想追求自己嘅夢想同事業。當初我成立呢個 Facebook Page ,其實就係想用一個女性嘅角度去分享產品。

諗諗吓我發現自己的確成日都身兼幾職。有時我覺得自己係個營養師,而家定時分享嘅健康食療,仲有ABC 汁、水素水等嘅產品,我介紹之前都會上網做過資料蒐集,了解佢哋背後嘅原理同營養成份先會分享俾大家。

有時又覺得自己係個實驗室人員,屋企有好多唔同嘅實驗設備,測風機、驗醣機,連氫氣測試機都有!

我個女有時又會笑我係神農氏,因為以前神農氏會親身試藥,唔理有無毒。而我又係成日親身試用唔同嘅產品,因為我堅持所有介紹嘅產品,都會至少試用過一至兩星期。有時試啲食落肚嘅,真係會痾㗎…

點解我咁堅持?因為我覺得社會上好似一直都好少以女性角度咁介紹產品。好多人(包括我以前嘅同學、好多男士fans)都會覺得女人其實得兩種:OL 同埋媽媽。我覺得唔可以咁樣 Labelling 標籤化女性,其實我哋仲有好多細分,好多唔同嘅性格同職業。

早前參加一個朋友嘅聚會,其中有個朋友只係俾我大幾年,佢同我講佢已經停咗經啦… 仲話 40 歲之後都已經好少同老公親蜜,佢話覺得好唔舒服。我其實都幾意外,因為個世界同科技每日都進步緊,但仍然會有唔少嘅女士唔太注重自己嘅身體,到提早更年期先至後悔。我諗會唔會係社會太少資訊叫女性注意自己嘅健康,令到好多人都忽視咗呢?
從我身邊嘅不同社交聚會,都令我從唔同嘅女士身上搵到題材。我藉著佢哋嘅問題,上網做資料蒐集,然後搵到能夠解決相應問題嘅產品,測試後再介紹俾大家。

我建立 May I Keep Young 嘅宗旨就係:自己身體,自己話事。希望各位女士們都可以好好注重自己嘅身體,做個快樂、健康嘅女人。