之前嘅「減少失眠食譜」Facebook Live，好難得三個年代：老中青嘅代表都一齊。老一輩嘅代表有我媽咪，我就代表四十幾歲嘅中年，而我兩位同事 Ivy & Lara 就代表年輕人。

好老實講，大家對今次 Live嘅想法都唔太相同。我哋傾緊應該點樣做嘅時候，一度鬧得有啲面紅耳熱，仲冷戰咗幾日，真係差啲搞唔成個直播…

大家都各持己見。媽咪就話個食譜應該加紅棗，佢話紅棗補血安神，對身體好呀會瞓得好啲。但我其實就唔想今次個 Live 同中醫掛鉤，而且我不嬲都唔太相信無科學根據嘅嘢。我反駁佢：「如果紅棗補血，咁大家都唔洗捐血啦，血液點可以透過食物增加㗎… 」

臨開 Live 之前 30 分鐘，我同媽咪都未有共識應唔應該介紹紅棗。好彩我兩位同事 Ivy & Lara上網搵到資料，證明紅棗雖然真係唔可以補血。但原來佢可以幫助身體產生褪黑激素，令我哋加速進入睡眠狀態，瞓得更好。

就係因為呢項關鍵性嘅資料，我哋最後都將紅棗加入食譜介紹畀大家。

仲有一個位係我哋本身諗住用 Mokkom 豆漿機整車厘子汁 (車厘子汁係最有效嘅天然安眠藥）但我哋都唔知可唔可以將啲車厘子就咁擺入去整。我兩個同事又無咩入廚經驗，係美女（地獄)廚神，正當我哋諗住打畀供應商問吓嘅時候，媽咪講咗一句：「洗咩問人呀，將啲車厘子去核再擺入去咪得囉！」

大家都恍然大悟，點解咁簡單嘅嘢我哋後生嘅都諗唔到。媽咪四十幾年嘅入廚經驗，果然係名不虛傳。

嗰一刻我感覺到老中青三個年代好似 Connect 咗咁，令我更有信心做好個 Live！

以上嘅事令我諗起上年嘅一套奧斯卡提名電影：《小婦人》。描述南北戰爭期間，一個家庭嘅生活同4位女兒嘅愛情故事。當中嘅二女 Jo 係女主角，佢極力游說即將出嫁嘅家姐逃婚，因為佢覺得婚姻並唔係女性唯一嘅出路。

《小婦人》嘅原著作者Louisa其實都係一個不婚主義者，佢堅持靠寫作養家。喺嗰個年代嚟講係非常前衛同大膽嘅諗法。

其實任何年代、任何地方，都總有人決心走唔一樣嘅路。有啲女性追求獨立，有啲女性只係單純渴望結婚生仔。「夢想」呢樣嘢，從來都無好壞高低之分。每個人都需要為夢想付出相應嘅代價，唔需要羨慕別人嘅夢想比自己宏大，只要自己唔後悔、唔會傷害到人就OK。

Live Show 完咗之後，我哋都有傾吓偈，閒聊之間講到大家關於結婚生仔嘅想法。

老一輩嘅媽咪，想法都比較傳統，佢覺得女人最緊要「嫁個有錢人」，之後生多啲仔，望子成龍，一生就幸福啦。我就唔太認同，老公有無錢唔係最重要，最緊要係大家嘅思維要相似，仔女亦唔洗好叻，可以有佢哋自由嘅發揮空間。而 Ivy & Lara 就覺得結唔結婚都無咩所謂，靠自己雙手最開心。佢哋而家不停學嘢不停增值自己，就係想未來有更多選擇嘅機會。

我估再後生啲嘅一代嘅諗法應該又會同我哋好唔同。佢哋可能對婚姻抱有更開放嘅態度，同性婚姻又或者更多唔同嘅婚姻組合，佢哋都可以接受。又或者更多我哋都唔清楚嘅諗法。

不過我覺得要追求自已嘅夢想，都要融合唔同人嘅意見。好似我會好尊重我媽咪嘅意見，唔會批評佢「嫁個有錢人」嘅諗法。我媽咪亦會尊重我，佢都會認同嫁個理念相似嘅老公其實都好重要。我亦都好尊重下一代，無論佢哋揀唔結婚又或者同性婚姻，我都覺得呢個係佢哋自己揀嘅路，我一樣會尊重。

只要大家互相尊重，最緊要當然係有一個健康嘅身體為前提，至於點樣去實現你自己嘅夢想，無論如何，我都會去祝福大家❤️