每年10月我最忙係處理燕窩生意嘅訂單，我老爺係做燕窩生意30年，前幾日我去咗佢個倉幫佢執貨。老爺話中秋過後，燕窩生意特別好(眼睇個倉去咗好多貨) 因為一到冬天好多老人家就會容易手凍腳凍，比較易病。好多人秋天開始就會為屋企嘅長輩入定燕窩，為冬天做好準備，準備幫佢哋補身。

聽老爺咁講完，我都醒起一到冬天，好多人都比較易有以下健康問題：失眠抑鬱、氣管敏感、手腳冰冷。其實我有少少心得想同大家分享，只要做好以下 3 件事，冬天就唔會咁易病：

1，減抑鬱：吸收退黑激素食物，助入眠

一到冬天，唔少人都會覺得個人易攰咗，成日都無乜精神，甚至會覺得情緒低落。原來醫學界有個詞語叫「冬季抑鬱症」。冬天日照時間短，如果一個人長時間唔接觸陽光，就會影響褪黑激素嘅生產。

褪黑激素又叫睡眠賀爾蒙，每當接近夜晚睡眠時間，我哋個腦就會開始分泌褪黑激素，幫助我哋進入睡眠狀態。而呢種激素係會受到日照時間、溫度等等而產生變化。如果缺乏褪黑激素，又或者產生紊亂，就會導致失眠。冬天大家都一樣要早起返工，但又唔夠瞓，慢慢就會影響心情，令到個人患上呢種季節性嘅抑鬱症。

早啲瞓當然有用，但都市人好多都係夜貓，未必可以做到早睡早起。平時做多啲運動，放假去行吓山放鬆心情都係一個好選擇。另外，我都會建議大家多吸收含有退黑激素食物，例如三文魚、香蕉、果仁類等等。呢啲食物會令人減少焦慮，提升睡眠質素。

同時亦要記住減少高糖份同高脂肪食物嘅攝取，因為呢類型嘅食物會導致血糖同壓力激素上升，令身體要花更長時間進入睡眠狀態。嚟緊我都會同大家分享更多關於退黑激素食物嘅食譜，有助改善冬天失眠情況。

2， 減少氣管敏感： 吸收滋潤 ＋ 膠質重食物

一轉天氣，大家都應該感覺到皮膚變得乾燥同敏感。但其實有個部位比皮膚更敏感，就係氣管。冬天空氣濕度低，口水分泌亦都會減少，造成喉嚨同氣管容易乾涸，甚至發炎。所以天氣一轉冷，身邊總有人不斷咳嗽。

飲食方面，除咗飲多啲水，亦可以多吸收滋潤 ＋ 膠質重食物，改善氣管敏感，等你「順返條氣」！例如：燕窩、花膠、雪耳、蜜糖等。運動方面亦要注意，避免做快速換氣嘅激烈運動，以免冷空氣刺激氣管。可以選擇慢跑、行山、踩單車，咁樣冬天就可以 Keep 到 Fit 之餘，又保護到條氣管。

3， 防手腳冰冷：常帶備薄外套或者披肩出街

好多時候我哋病未必係凍親，有可能係著太多焗親。秋天早晚溫差比較大，如果著太厚嘅衫出街，中午咁熱又無得除其實好易焗病。其實唔洗著太多，只需要出街帶備一條披肩又或者薄外套，夜晚凍嘅時候就可以防風保暖。

秋天嘅重要性就好似女人生完坐月咁，只要我哋妥善咁喺呢段時間準備好換季，唔好俾自己焗親或者凍親，增強抵抗力，當冬天到嘅時候，手腳自然冇咁冰冷，我哋就唔會咁易病。

秋天嘅來臨通常好短暫，但秋天嘅出現話俾我哋身體聽要嚴陣以待面臨冬天呢場仗。想身體健康啲無咁易病，其實都有策略去預防同解決。好多女士過咗 40 歲就會覺得個人易老左好多，身體大不如前。但其實要 Keep Young 唔係一時三刻嘅事，都係靠以前嘅習慣累積，每日做多少少去保持。

同樣道理，想冬天無咁易病。我哋就要提早做好準備，喺秋天或者更早之前，每日做多少少，咁冬天大家都一樣可以擁有一個健康強壯嘅身體。