今年疫情下嘅七夕好難忘！但老公竟然送咗扎紥花俾我仲話：「牛郎織女一年先見一次，我哋要戴口罩慶祝都係濕濕碎啦！」實情係佢見我呢排好似成日心緒不寧，好多嘢諗坐唔定咁… 的確，可能因為工作關係，我腦入面有好多計劃同想法想要執行，每日都諗緊點樣可以做好啲網購生意，令到自己有啲過分焦慮同不安😔

老公佢話：「聽人講花可以令人平靜，透過專注於植物，會帶我哋進入一個冥想嘅世界，令到心境可以平靜落嚟。」唔怪之得每日起身，飯枱都有一支花，意外嘅係我又好似比之前更加專心、更加情緒平靜，呢種感覺叫做活在當下。

所以乜嘢係活在當下，就係你答唔答到以下嘅問題：
而家嘅天氣係晴天定陰天？
而家嘅溫度熱唔熱，舒唔舒服？
而家嘅空氣入面有咩味道？
而家安靜嘅空間入面為你帶來乜嘢感覺？

有時候做嘢忙咗成日，坐喺梳化上面休息嘅時候，我個腦都係諗住：
今晚煮咩好？
下次拍邊個產品嘅片好？
Inbox 入面嘅留言我覆晒未？
導致我嘅身體根本無辦法放鬆、大腦完全無休息同喘息嘅空間。

望住手中咁靚嘅花，好似溫柔咁提醒咗我，自己而家其實係好幸福、平靜，無論遇到任何困難同挫折，只要帶著感激、理智嘅心，一定都可以解決到。

好感恩，我身邊一直都有支持我嘅家人，佢哋令我明白到自己並不孤單，無論點佢哋都會陪伴著我。

我每日都會提醒自己要活在當下，聽落簡單，但對現代人嚟講真係唔容易，尤其是而家疫情之下快樂、健康更加重要。人生係一段追尋身心健康快樂嘅旅程，希望大家每日都可以花少少時間，同自己相處，冥想同感恩一下自己所擁有嘅嘢，感受吓呢個世界。

祝大家七夕快樂、甜甜蜜蜜、開開心心！