最近我出live，我一家人都有佢哋唔同嘅見解。

👨🏻‍🦳打燈爸爸 : 「你對啲客要好似對屋企人咁，例如佢哋唔識用個產品，就一定要教到佢哋識。好似以前我哋屋邨樓下嘅士多，啲父母有時返工太忙，都係將自己啲仔女擺喺佢哋度湊，大家都互相信任，相處得好融洽。May，你記住都要咁樣對啲客呀！」

🧑🏻‍🦳嘉賓媽咪 : 「我就覺得老實最重要！唔可以全部產品都有讚冇彈，一定要有嗰句講嗰句。好似嗰部豆漿機咁，係就係好好用好方便，但用嘅時候真係好嘈，呢個缺點你一定要講出嚟。又好似嗰部低醣電飯煲，雖然好健康，但係煲出嚟嘅飯唔夠粘而且真係唔甜，你一定要一五一十同啲客講清楚。」 

👦🏻 攝影細佬 : 「價錢大眾化最重要，我賣二手書賣咗廿幾年，好明白唔係個個都接受到一個貴嘅價錢去買新野，但又有需要，好似啲學生咁，佢哋始終要返學要買書，二手書就俾咗一個平靚正嘅選擇佢哋。所以我認為一個產品嘅價錢要夠大眾化，當然質素亦都要有保證，咁樣啲客先會繼續幫襯你。」 

👧🏻 客服家姐 : 「May，呢排多咗好多詐騙黨呀，你唔好再賣貴價貨啦，唔想你俾人呃錢！」 

我對佢哋四位嘅意見係全部 照。單。全。收！因為，我網店有今日嘅小小成績，係佢哋每一個人嘅功勞。我一路都無忘記爸爸媽咪教我嘅一句說話 : 真心待人❤️

細個嘅時候屋企環境唔好，所以對我嚟講完全無辦法靠父母幫助，但屋企人係無得揀，至少我嘅成長唔會覺得屋企人有得選擇。

以前讀書我都無諗過前途嘅問題。雖然好好彩入到大學，仲要係我想讀嘅社工系。但如果你當時問我對未來嘅規劃，我真係一片空白。當時只係諗住一畢業就即刻同男朋友 (即係而家我老公)結婚🙈 因為我覺得好多嘢都唔到我揀…我嘅前途唔會覺得有得選擇。

但我一路都謹記住阿媽嘅教晦：「錯誤只要慢慢修正，自然就會有好嘅結果，只要你真心待人。」的確係，人嘅命運好似冇得選擇，就好似我地無得揀我喺邊個家庭出生、冇得選擇入大公司…做人好似冇得選擇，但我哋可以選擇做一個善良嘅人。

最近排睇咗一本書，叫做《不要在該奮鬥時選擇安逸》。呢本書有⼀段說話：「人的一生，就是用盡自己的全部努力，將這本來傾斜的世界慢慢扳平的過程。哪怕不能馬上看到效果，或者使盡全力也不能實現絕對的公平，但進步一寸，就有進步一寸的歡喜。」

新一代嘅購物模式我唔係好認同：例如追新款、限定版，明明一個小學生有iPhone 6都夠用，又要追新model人有我有；追Nike限定版波鞋排隊排成晚；我更聽過用屋企人個名，借貸款去買名牌手袋；更見過親戚仔女用分期付款去旅行(7日豪華團，分一年錢去還😂)。為咗咩？就係為咗可以Post 上網同人炫耀😩😩而家呢個世界，成個消費觀同價值觀都已經係傾斜同扭曲晒。

呢D就係一個傾斜咗嘅價值觀，我希望從我自身慢慢幫社會糾正。

其實購物係為咗乜嘢？最根本嘅原因就係為咗解決生活問題。我着重介紹產品價值，目的就係想改善大家嘅生活質素，令到我心愛嘅人可以生活得開心。而將呢一個價值觀宣揚開去，好好教導下一代，就係我嘅使命。

雖然我兒時冇辦法靠父母幫助去外國讀書、供樓，但而家我有辦法靠父母幫助我出live😂😂因為我一家人都相信：大家香港人係一家人，我哋要真心對待我哋一家人

*回應我爸爸對客要似一家人：我專登喺Facebook保留review,我嘅顧客對我嘅讚/彈我都唔會刪除，希望保留你哋對我嘅最中肯嘅意見給我改善

**回應我媽咪要我老實介紹產品：我繼續我嘅作風一唔會「只談優點，不談缺點」，有陣時更加會強調產品弱點，或者將產品嘅弱點更加詳細介紹用法俾大家深入了解

***回應我細佬要我價錢大眾化：我保證我店售賣嘅產品係跟足供應商建議零售價，但凡所有顧客發覺我買貴過建議零售價，我願意補回差額或元銀奉還。

****回應我家姐要防詐騙，呢個最近好頭痛😩😩最近都有幾個騙子用假卡呃咗我的貨，但我有信心優化流程，我亦唔會因為幾單騙案而放棄我嘅理念－堅持介紹優質產品，不分產品價錢平或貴