暑假快到尾聲，回顧今年暑假，就是玩玩玩。最深刻的，是一家大細上咗富士山頂。目的就是要教導小孩懂得珍惜，鍛鍊意志。經常在FB看見父母post出旅行照片，幼稚園就去過10次日本，5次滑雪，坐商務客位😱😱「我想我的小孩盡早學習上流的生活，方便日後融入上流的圈子」仿佛家長一切的考慮，都是想讓孩子贏在起跑線的苦心。

回想自己第一次出國是讀大學，想去旅行都是自己拚命做補習儲錢，千辛萬苦才買到一張機票，去到1分1毫計到盡，正正因為好辛苦才爭取到這一趟旅行，所以非常珍惜，我到今天仍清楚記得當時去過的每一個地方，食物的味道，遇過的事，真的不用看照片仍能記起。但現今小朋友呢？我問佢哋上年去咗邊都唔記得！

與老公有上富士山頂的構思是：最近我倆小孩終於突破我們防線，擁有自己手機，每個星期六日不如以往願意跟我們到户外行山，六日留在家中打機。暑假到了，我和老公很忙，只能夠去日本採購加旅行，老公向小朋友提議：「如果同我地去東京旅行，你哋一定要上富士山，而你哋要上富士山，就一定要喺香港鍛鍊四個星期。」細佬比較純真，願意跟我們在香港鍛練體能。家姐…總之有得去東京就乜都懶理。

機會總俾有準備的人，有準備嘅細佬行得快啲，舒服啲，沿途能夠欣賞富士山嘅風光；相反家姐全程放負，唉聲嘆氣，亦都受咗傷。下山之後，我同佢講解呢次上富士山嘅意義，小孩似懂非懂，我希望佢哋學識收穫前要有事前嘅付出，以及勇於解決問題嘅意志。當然有付出就自然會珍惜，唔會覺得旅程得來咁容易。

歡樂旅程之後，老公亦要求小朋友幫公司手（冇錢義務架喳，所以唔係童工😂）我承認我與老公嘅教育方法係有同現代父母唔同，我哋覺得身教係最緊要，我灌輸嘅價值觀係一分耕耘一分收穫，上流社會每個人都想做，但我想佢哋學識係上流社會嘅人格，唔係佢哋出身。