尋日去探我大女做Mirror 相展做義工之前，返左亞女學校參加家長日，氣氛好沉悶，突然比一個家長「教訓」佢小朋友嘅金句吸引左我：
「你做咗10幾年人，都唔知日後想做乜工作？」一個貌似50幾歲嘅阿爸好高姿態咁話佢中二嘅女同學
「我好似你10幾歲嘅時候，已經知道未來工作係乜，咪就係搵銀！」
「冇時間溫書？時間可以創造出來㗎嘛！」
「文言文唔好，就睇多啲文言文嘅書咪得囉」
以上嘅金句令我忍唔住笑，那位中二女同學平日生活我都大致了解：每日讀書、補習超過12小時，每天八點先返到屋企，星期六日都係補習及做阿爸指定安排嘅興趣班，難怪中二女同學表情好似靈魂出竅，或者小朋友真係諗緊究竟點樣可以將時間創造出更多更多⋯
時間一轉帶咗pizza探我大女，佢係義工團隊裏面好投入，一邊跟團隊商量點樣可以將流程做好啲，一邊分享食物比其他義工，我見其他義工似乎唔係同阿女來自同一間學校，但大家又好有默契同合作性，我建議亞女整張卡片，Title直情叫「Mirror 相展推廣組執事」😆，無聊事情認真做😬
幾日前聽過一個李嘉誠維港投資嘅新聞，題目為「為未來留座」，佢講到點解佢公司而家咁急切要製造植物食物，就係為咗解決威脅地球健康嘅碳排放、即棄餐具及塑膠包裝，席間李生嘅一句說話令我好點頭贊同：「…我嘅工作就係為未來創造機會，地球嘅健康已經受到嚴重威脅，我哋要靠創造力由零變一，懂得創新、擁抱未來，就係教育嘅起點。」
好多人相信李嘉誠成功係因為佢生於遍地黃金嘅時代，但我由心相信佢係一個真正明白工作嘅意義嘅人：熱忱+解決未來嘅需要。因此，只懂得迷戀過去嘅人，會話而家係一個無可救藥嘅黑暗年代；而相信及擁抱未來嘅人，就會掌握能通往成功及改變未來嘅鎖匙
而由李嘉誠帶出對教育界嘅遠景亦都係我嘅心聲，未來人類嘅工作會有好多將會比AI取替，昔日嘅「鐵飯碗」亦都唔會再有穩定嘅收入，再講，工作從來唔係只係「搵銀」，認識自己對事物熱忱的由來，及正視未來嘅需要，先係工作真正嘅意義
說到底，學校亦唔係教育的全部，我哋作為父母家長、或社會上唔同界別嘅人亦都要為下一代好好規劃教育嘅道路，令到下一代可以喺課室以外投入參與，畢竟仔女從學校吸收嘅知識只係小部份，我相信「身教」及父母嘅榜樣先至係最重要
時間去返見家長當日嘅下午，我喺同一間餐廳又見番佢哋兩父女，爸爸仍然皺起眉頭，揸住餐牌舉棋不定唔知食乜好，阿女突然語重心長同阿爸講：
「老豆，你做咗50幾年人，都唔知自己想食乜？」
幾時都話小朋友學嘢最快最吸收，唔係從學校身上，而係從家長身上

Facebook 原Post：

https://www.facebook.com/MayNganBirdNest/posts/4473629616017999