做一個神奇媽媽係要同行，不是協助（含少量劇透）
暑假尾聲，其中一個家庭活動就係睇「媽媽的神奇小子」，入場前以為係講殘障人士奧運成功係因為背後有個神奇媽媽，但套戲我覺得係講現實，兩母子關係多密切，最後亦都要為殘酷嘅現實最終帶出分歧
子：我只係純粹想跑
媽：跑步唔係唔啱，但唔長遠，拍廣告多個錢，日後保障啲⋯
呢啲媽媽肺腑之言係我地身邊非常常見，媽媽們會經常無時無刻提住：「我咁樣做係為你好⋯」但那邊廂就為仔女「做多咗」、甚至越界侵犯佢哋嘅私隱。
奧運大熱，最近我啲媽媽group咁講：
媽媽A: 「學游水梗係要學齊四式啦，姿勢要正確！」我心諗：學游水我只係為咗求生
媽媽B：「要玩運動梗係學劍擊啦！日後攞奧運金牌起碼有獎金，就算入唔到奧運都可以攞嚟考名校嘛！」我心諗：玩運動唔係淨係為興趣咩？
係我以前讀社工有講過，作為媽咪對待仔女(甚至乎社工對待受助者)嘅角色最好係同行（accompany），而非協助（assist)，同行者好似戲中吳君如角色一樣，時常比仔女知道媽咪喺終點等你，就好似BB爬行大賽角色一樣，媽咪只係終點等BB ，BB攞唔攞到冠軍根本唔重要，仲要係BB知道媽咪無時無刻都會喺終點等佢；而協助者不單止出心，仲會無形中出力，就正如BB爬行大賽一啲過分出力嘅媽咪一樣，喺BB爬行中途不斷用玩具利誘，一步一步同佢踏上終點，務求令佢攞到冠軍
出心出力、一步一步同仔女同行有咩唔好？媽媽們話就話同仔女同行，但同行過程管住晒，亦不知不覺將自己嘅價值觀灌輸係仔女度
咁作為媽媽應該要點樣做？我嘅意見係仔女嘅成長過程只要比佢知道你有同佢一齊同行go through 就夠，唔需要喺過程中比太多意見
作為父母，只要仔女知道：「我知道自己係比人慢，所以我要向前衝！」其實就夠！「輸在起跑線」反而可能係仔女求進步嘅動力

Facebook 原Post：

https://www.facebook.com/MayNganBirdNest/posts/4240096599371303