Mirror 嘅威力真係大，連平時唔太鍾意運動嘅大女，都為咗追Mirror活動，暑假朝朝八點早上起身（仲神奇都唔使校鬧鐘😂），約埋一班Jeremy應援團嘅朋友諗吓下一次活動點樣可以幫Jeremy 「威威」！

大女唔識攝影，但每次同應援團朋友商量點樣幫Jeremy出風頭時，佢衡量過自己嘅優點：「我生得夠高，又有力揸長鏡頭，而且我自學學識到用iPad製作Jeremy明信片…」大女仲首次用自己畢生嘅積蓄買左部二手相機，仲自己去旺角格價自學攝影。 我亦都冇阻止，老公見佢有新嘅興趣當然非常開心：「真正嘅興趣其實係好個人，唔係為攞獎而做，唔係為別人而做，更加唔係為入名校而做；雖然做啲無傷大體嘅小玩意，但係又唔介意花長時間去做，而當中亦搵到一份莫名嘅滿足感！」

老公有感而發，因為佢小時候嘅暑假亦都只能好似大女細仔今年咁樣悶喺屋企，老公細細個暑假冇嘢做就攞起支筆，喺所有書本有空間嘅位置畫畫，就係咁，一整個暑假佢就變咗「畫畫達人」，而老公而家佢嘅廣告工作，亦都同佢嘅興趣有關。

關於興趣呢個事情，我亦遇上一個相反嘅故事：事緣我約咗同事Ivy 、Lara來我屋企食飯，佢哋兩個都係歌唱老師。佢地兩個今年見到一個好奇怪現象：「有一種興趣，係家長覺得你鍾意😆」

「我哋見到唔少家長喺暑假都幫仔女報讀好多興趣班。但佢哋好似都冇仔細咁睇到仔女係咪真係對嗰方面有興趣…」

教育其中一個目標係為未來裝備，而唔係教一啲上一代、現代有價值嘅知識。以我70後嘅價值觀，如果入到公務員、ibanker係成功嘅象徵，好多似我70後已為父母嘅家長，仍然暑假催谷仔女都要成為精英，但仔女仍然過着有壓力、冇色彩嘅暑假。

所以當每次我哋見到下一代自發、自創一啲大人唔理解嘅小玩意，只要無傷大體，都盡量唔好阻止，大人更加唔好掃興；因為我相信，從我哋呢一代睇嚟一啲冇價值嘅經驗或體驗，好大可能係讓新一代搵到自信、新價值嘅出路。