我相信每對伴侶最唔想見到嘅，就係愛情步入倦怠期。

身邊不時都有朋友問我：「May，點解你同你老公可以成日都咁 Sweet，好似仲係熱戀期咁嘅？」通常我都唔會正面回應，反而會同佢哋講一個故事。

大家唔好睇我成日去跑步，以為我不嬲都係咁健康咁Sporty。其實以前嘅我係唔鍾意跑步、唔鍾意做運動！而我老公就正好相反，由細到大都非常好動，好鍾意做運動。生完小朋友之後，身型真係暴漲咗幾個碼... 我一直都好想減肥，但又抵抗唔到食物嘅誘惑；想做運動，又欠缺動力。於是，我老公開始遊說我同佢一齊跑步。佢話：「由屋企到終點係 3KM，我一定會陪著你，唔會快過你，亦唔會慢過你，我哋一齊跑去終點好冇？」

既然老公咁講到，我都唔好意思再拒絕佢😅仲記得我哋跑呢一次嘅 3KM，足足用咗一個鐘 (正常人行都快過我😂）因為嗰陣時我嘅體力可以話係負分，跑咗 1KM 已經頂唔順想停。不過老公佢冇取笑我，仲不斷鼓勵我。佢同我講如果真係跑唔到，就行吓跑吓影吓相。到我真係體力負荷唔到，不停喘氣嘅時候，佢亦都好關心我，仲講笑話舒緩我緊張嘅情緒。叫我諗吓仔女諗啲開心嘢，好似氹細路仔咁氹我。最終，我哋都順利完成目標！

自從呢次經驗之後，我冇驚咗跑步，反而想繼續挑戰自己。由我真係跑完全程 3KM 開始，到 5KM、10KM，我一次比一次進步。喺老公嘅鼓勵吓，我仲挑戰跑馬拉松。於是，三年前，我報名參加咗名古屋嘅女子馬拉松。全程 42KM，我喺賽道跑，老公就喺賽道側邊嘅路陪我一齊跑。

我想由呢個故事帶出一個我對愛情嘅感悟。其實現實世界，邊有情人係可以 24 小時都保持熱戀？即使我哋冇辦法維持熱戀，但一樣可以保持恩愛。我同老公結婚二十年，有感到煩厭或者倦怠嘅時期，一定係無可避免。就好似我哋跑馬拉松都會經歷過「撞牆」、抽筋，第一次遇到呢啲情況，當然會好驚。但捱過咗，其實都覺得冇乜嘢。

熱戀係一種盲目嘅熱愛，雙方都全神貫注喺二人世界，係容忍度最高嘅甜蜜階段。就好似跑馬拉松頭 10KM 一樣。主辦方會搞到成個 Party 咁，大家都好輕鬆、好開心，大家一開始好似唔識攰咁。

恩愛比熱戀更高層次。恩愛係當兩個人不再沉醉喺二人世界，回歸現實。面對人生各項大小事情，都仍然會拖著對方隻手一齊走。就好似跑完馬拉松頭 10KM 之後，側邊為選手加油打氣嘅人開唔疏落。仲記得嗰時喺名古屋，跑到十幾公里嘅時候，會經過一啲當地嘅屋村，見到居民都好輕鬆，享受假日嘅時候，我不禁問自己點解要攞苦嚟身？恩愛其實就好似派對過後，回歸現實嘅一個情緒。

但點都好，其實總有方法係可以繼續跑落去、總有力量係大家可以一齊堅持落去。我哋一定要明白同釋懷，倦怠同平淡係人之常情。

愛情並唔係要一口氣跑完42KM。途中其實可快可慢，速度係由我哋自己控制。只要大家一齊解決途中嘅困難，大家一齊有力量跑到終點，呢個先係真正嘅愛情。