關於尋日供應商請我哋食下午茶，有感而發，今朝唔跑步都要打篇文抒發下

話說前幾日跑步嘅時候，扭親隻腳 😢 首先，當然去咗睇醫生。雖然唔算好嚴重，但都要覆診… 睇完之後，我即刻聯絡咗我嘅保險經紀（亦都係我中學同學），想向佢查詢吓咁樣嘅情況有冇得賠。以我認知，好似唔止需要醫生紙，仲要有其他專業人士，例如物理治療師嘅治療證明，先有得賠。穩陣起見，都係打電話問吓我舊同學。同佢傾咗大概半個鐘，感覺到佢都有啲唔耐煩😅之後，佢爆咗一句：「總之腳傷就有得賠！」

我發現「總之」呢個詞語真係老是常出現😶以前媽咪都成日同我哋講：「總之就係為你哋好！」；之前聽到個同事同佢老公鬧交，佢老公都係好理直氣壯咁話：「總之我琴晚淨係同成班男人去飲酒睇波！」；啲Sales亦都好鍾意話：「總之呢部冷氣機就最好最慳電！」…有冇發現「總之」係幾時用得最多？就係當一個人怕煩、怕負責任、可能掩飾緊大話、又或者敷洐緊你嘅時候。

講返我同我舊同學嘅對話。 當佢爆咗一句：「總之腳傷就有得賠！」我都嬲嬲哋，佢嘅態度令我覺得，好似我打俾佢係浪費緊佢時間咁。於是大家陷入咗一段 Dead Air… 佢就開始轉移視線，讚我個仔好乖，升到中學好叻仔。我心諗：你十年冇見過我個仔，點知佢而家乖唔乖😂況且，讀完小學緊係升中學，你又唔知佢讀咩學校，咁都有得讚？

我發現成日講「總之」嘅人，但凡達唔到佢哋嘅目的，佢哋都會轉移視線。通常都係打感情牌，講吓你嘅仔女，因為作為父母嘅消費者，通常買產品都會諗吓仔女。佢哋呢種行為都係想單生意最後傾得成，又或者掩飾佢哋冇做好資料蒐集。

相反小朋友其實好少講「總之」，因為佢哋抱住一顆求真嘅心。即使佢哋有嘢唔識，或者冇做功課，佢哋都會勇於承認，唔會掩飾。更加唔會為咗金錢，而掩飾自己嘅無知。所以喺呢方面，大人真係要好好向小朋友學習！ 公司嘅客服同事：Pat、Michelle、Phoebe 都係媽媽。我同佢哋分享咗以上嘅故事，佢哋都好同意唔應該污染小朋友求真嘅精神。喺客服嘅層面，我觀察到佢哋都好少用「總之」呢個詞語。當有啲關於產品嘅問題，佢哋唔知點解答嘅時候，佢哋都會寧願花多啲時間去研究，或者追問供應商，務求唔會敷衍客人。

而面對供應商，我家姐Phoebe更加唔會求其，從來唔會同供應商講：「總之今個星期找數啦…」「總之我已經出咗貨啦…」所以我啲供應商都好鍾意佢哋，每逢星期五我都好多謝供應商請我地食下午茶🙇🏻‍♀️🙇🏻‍♀️

總之，我哋嘅客服係最優秀嘅團隊 😂👍🏻