唔知你有冇試過為咗減肥，日日計算自己卡路里攝取量，搞到每日食飯都好似「埋數」好有壓力…而家我想分享一啲方法你唔使成日計住，但又好確實知道卡路里會減少左嘅方法：

1/ 多飲水：接收飢餓及口渴都係來自腦部（下丘腦區）嘅同一個訊息，有陣時佢會將口渴同飢餓混淆，只要你飲多啲水，其實真係可以令腦部訊息覺得你已經飽咗肚。所以我經常都會帶一支清水出街，你就會減少想食街邊食物嘅衝動。

2/減少人工、加工嘅食物：好似街邊食物、麥當勞、午餐肉香腸…適當食係可以，但係千祈唔好搵呢啲食物做主食。佢哋嘅熱量一定非常高，而且高鹽高納食完令你更想飲可樂、珍珠奶茶，卡路里一定非常高

3/ 食多啲蛋白質食物：蛋白質含有非常大量嘅營養素，只要每餐進食高質量嘅蛋白質，飽肚之餘你亦唔需要怕肥。因為過多嘅蛋白質係會排出，唔似得高卡路里嘅食物會儲存成為脂肪

4/ 每餐加入大量蔬菜：蔬菜係低卡路里、營養豐富嘅食物。尤其是係愈五顏六色嘅蔬菜就愈好。而且纖維可以大大降低升糖指數👍如果想減肥減磅有效，建議食「非澱粉類蔬菜」包括菠菜、生菜、西洋菜、韭菜及莧菜

5/ 觀察食物含油量：比起成日計住我食緊嘅食物有幾多卡路里，我其實更關心有幾多油量及脂肪。例如去茶餐廳如果我一定要進食乾炒牛河，冇錯佢卡路里係好高，但我一定會叫夥計「少油」或「走油」

6/ 將含糖飲料轉成低熱量飲品：含糖量飲品卡路里係最肥，唔覺唔覺一日飲五六杯一個月就肥五六磅。所以去茶餐廳、出街飲嘢要選擇低熱量飲品，或者轉飲烏龍茶、梳打水都係好方法。

食嘢係一個好開心嘅過程，成日計住卡路里就會好大壓力，只要記住以上六項準則，你就可以同家人、朋友開心進食而可以慢慢減到肥，大家試吓啦☺️