有個好開心嘅消息想同大家分享 🥰我拎到 Shopline 頒嘅優網認證！佢哋從產品質素、客服、承諾送貨、真貨保證呢四大條件做評測。話說老公陪我去領獎，佢見到我上台之前領獎嘅全部都係開咗比較耐、規模大、實力強大嘅大公司，而且成班員工上去領獎，好架勢！

到我上台領獎嘅時候，只係得我一個人，形成好大對比 😂 我一落台，老公有啲驚訝咁問我：「老婆，點解你咁叻可以同啱啱嗰啲大公司一樣拎獎？」

我笑住咁答：「無呀，首先我好信任Shopline 呢個 Partner，基本上佢哋提出嘅建議，我都會參考同試做。同埋，我一直都好專心咁做好一件事：設身處地真誠對待客人。」

點解我成日都強調要「專心做好一件事」？其實我都係受《小王子》呢本書啟發。我好記得小王子講過：「大人就是喜歡數字。當你提起一位新朋友，他們從不會問起真正重要的事。」我都好認同大人某啲方面係好無知，成日掛住追逐數字，而忘記咗「真正要做嘅事」。

好似大女以前讀小學嘅時候，班主任曾經問過我，點解唔幫佢睇功課？點解唔幫佢温習？一星期溫習至少要20小時…知我無幫個女報補習班，仲會叫我個女同我講，要我幫佢報補習班，一星期至少要補10個鐘…其實呢樣野我一直都唔認同，點解佢咁細個就要佢報咁多無必要嘅補習班。升中之後，佢而家讀緊嘅中學比較輕鬆少少，唔洗啲學生係咁追成績。反而個女讀書成績仲好過以前，成日攞獎名列前茅，個人變得更有自信心。

點解會咁？我認為因為佢只係單純咁熱愛學習，做佢覺得真正重要嘅事 ，唔會只係為咗追分數去盲目讀書。

所以今日我能夠得到呢份認同，就係我「真誠對待客人」 嘅成績表。我一定會繼續努力。即使我有再多嘅供應商、再多嘅獎項、再多嘅公司資源都唔會影響我呢個初心。

而我再次多謝我嘅團隊、我嘅家人，其實冇你哋嘅支持我嘅初心只係空談；以我更多謝係每一個顧客及fans，你地對我嘅讚賞及劣評，其實先至係一張最真實嘅成績表。