今日係我家姐生日，HAPPY BIRTHDAY 家姐Phoebe！😘😘 我諗好多客人都見過我嘅家姐，對佢應該唔陌生。其實佢嘅崗位非常重要，每日要應付嘅工作量亦都非常沉重。佢一直對顧客無微不至，亦負責公司嘅會計、訂貨等嘅工作。所以，佢其實比我更加忙碌… 🥺

點解佢咁細心咁有責任感、對顧客咁無微不至？咁就要由我哋小朋友開始講起…我哋係屋邨長大，細個時爸爸返工一手撐起頭家，媽咪要照顧四個小朋友，一腳踢，所上自細就叮囑家姐要照顧三個細佬妹。家姐一直將父母嘅教誨牢牢咁記喺自己嘅腦袋入面。所以由我小學、到大學畢業出嚟做嘢、結婚生小朋友、到我創業，家姐都好照顧我，而且一直將最艱辛嘅工作揹上身。就算而家人到中年，佢都比起我哋公司嘅男同事更有魄力，搬搬抬抬都唔會假手於人。我有時見到佢咁忙都會忍唔住想幫佢手，但係佢都會話唔洗，話呢啲嘢等家姐嚟啦～

佢咁無微不至嘅性格，在私嚟講梗係無傷大雅，直情係窩心添啦！但係對我嘅May I Keep Young 網購大方向就存在住好大衝突及分歧。點解咁講？舉個例子，例如佢今日主要嘅工作係埋數，但無端端佢見到有貨到咗，又忍唔住走咗去幫手搬搬抬抬，變咗主要嘅工作就會擺埋咗一邊；眼見有啲客人會專程上公司要求睇產品嘅用法示範，家姐就會建議Office應該擴建，甚至叫我開實體店；佢仲好樂易地鐵站面交…

但我作為公司嘅負責人，我哋產品嘅價錢之所以咁相宜，就係因為我哋喺某啲方面有自己嘅原則，唔會妥協。例如開實體店，成本一定會大大增加，我唔想將呢啲多餘嘅成本轉移去客人身上，將產品價錢提高。面交亦都係我一直堅持唔做嘅嘢，假設一個客話要喺將軍澳交收，一個話要喺元朗，咁我哋時間同人工嘅成本亦會提升…我做網購嘅本意，就係想客人可以聽完我對產品嘅介紹之後，喺網站落單，之後透過物流收到貨，成件事好順暢同一條龍，唔洗增添額外嘅成本。所以，家姐同我喺生意上嘅想法其實好唔同，我哋亦試過因為咁而鬧交，有一段長時間嘅冷戰期。我一直都避免同佢有生意大方向嘅交流，廢事大家唔開心。

直到我啱啱聖誕前見到佢好窩心咁對個客，令我哋嘅關係破冰回暖。前排我哋隻翻譯滑鼠賣得好好，當中不乏銀髮族購物。個安裝流程我哋睇落簡單，但對佢哋嚟講其實有啲複雜。所以好多銀髮族買完隻滑鼠都會去我哋 Office，叫我哋親身示範點用。每次家姐都會提佢哋入門口時要消毒雙手、量體溫，佢對每個人都好細心，解釋滑鼠用法嘅過程長達30分鐘，由安裝到點用都解釋清楚。家姐呢種無微不至嘅性格係發至內心，佢對客人真係好熱情好有心❤️作為細妹，我被佢深深感動。所以我最後主動同佢破冰，唔希望因為公司上嘅問題，破壞咗我哋兩姐妹嘅關係。

公司發展到而家，我認為需要比家姐一個「做自己」嘅空間！唔想佢再因為以前爸爸媽咪強加俾佢嘅教誨而無咗自己。其實佢用心解釋產品嘅做法，同我一直喺社交平台用心拍片介紹產品嘅做法同概念係一樣。所以我好想同樣俾到家姐一個發光發亮嘅工作空間✨

人嘅年紀大咗，連外型都變咗、人亦都不免世俗左、計算多咗，但我哋嘅心地及價值觀由同童年時代直至而家都不變。我哋都相信只要大家一家人，幾難解決嘅衝突都可以化解！

家姐一直都好堅持：「顧客係一家人、所有香港人都係一家人。」所以我哋一定會好好用心咁去照顧我哋嘅家人，令到大家都可以開開心心🥰最後，想大家一齊留言祝家姐「生日快樂🎂」啊😘😘😘！