自小屋企人都叫我林阿珍，成日漏呢樣唔記得果樣，雖然瘦削，但手腳唔協調，輪輪盡盡。運動當更係我死穴，大學唯一要retake 嘅就係體育。

 

但自從小朋友開始長大，帶他們四處玩，發覺原來世上有咁多好玩又challenging 嘅嘢玩(其實只是游水單車行山潛水跑步，但我全部都唔識)，借機重拾我童年錯過了的一環–運動！

 

接觸運動之後，發覺自己後生又靈活過以前。慢慢地更定下目標，今年要完成人生第一個馬拉松！「你唔得架！讀書就叻，馬拉松好講天分，唔係你睇幾多馬拉松書就可以做到！」我認我係學院派。連跑步都要跟足書本指示，練咗半年，又心率訓練又肌力訓練，都仲係8分鐘pacing，連老公都笑我慢！

 

但今次街馬32.195k令我對自己刮目相看，開頭「逢人過我亅到終點「過返人」，就係因為我跟足書本LSD同做自己！認定自己pacing，一步步跑，原來我無自己想像中意志力咁薄弱呢。

返到屋企仲要無穿無爛無抽筋，仲唔駛昏睡一遍，老公都好驚訝，之後帶我去飲杯白酒定定驚同慶祝！